Iste’molchilar huquqlarini himoya qilish Agentligi tashkil etildi

   Iste’molchilar huquqlarini himoya qilishning huquqiy va institutsional tizimini tubdan takomillashtirish chora-tadbirlari to‘g‘risida Prezident Farmoni qabul qilindi (PF-5817-son, 11.09.2019 y.). Bu haqda Adliya vazirligining “Huquqiy axborot” kanalida habar berilmoqda.

   Farmon bilan Monopoliyaga qarshi kurashish qo‘mitasi huzurida Iste’molchilar huquqlarini himoya qilish Agentligi tashkil etildi.

   Agentlik iste’molchilar huquqlarini himoya qilish va reklama bozorini tartibga solish sohasida yagona davlat siyosatini ishlab chiqadi va amalga oshiradi.

   Farmonga ko‘ra, Agentlikka iste’molchilar huquq va manfaatlarini himoya qilish, uni buzgan shaxslarga nisbatan chora ko‘rish uchun sudga murojaat qilish kabi huquqlar berildi.

   Shuningdek, Agentlik chakana savdo va xizmat ko‘rsatish shoxobchalarida tovar va xizmatlarning nazorat xaridini o‘tkazishi, ularni ekspertizadan o‘tkazilishini tashkil qilishi mumkin.

   Agentlik va Qo‘mitaning hududiy boshqarmalari sudga kiritiladigan da’volar bo‘yicha davlat boji to‘lashdan ozod qilinadi.

   Agentlikka Qo‘mita raisining taqdimnomasiga binoan Vazirlar Mahkamasi tomonidan lavozimga tayinlanadigan va lavozimidan ozod etiladigan direktor rahbarlik qiladi.